2016年5月31日 星期二

野人6歲生日之快閃海洋公園

野人生日正日係SCHOOL DAY

之前佢地一直表示生日想去「海洋公園」

睇睇海洋公園個開放時間,原來6點就關門大吉

放學去到都差唔多一點啦

所以只短短逗留海洋公園5小時

香港人生日免費入園,野人第一次享用此優惠

(要佢地簽個名拎飛,即係呢個名真係簽嚟都可有可冇,好好笑!!!)


為爭取時間,喺「海洋奇觀」入面嘅海龍王餐廳食午飯

咁就可以邊睇魚邊吃埋飯


順便預訂咗個驚喜小蛋糕俾野人喺海龍王餐廳慶祝 :)

提示︰蛋糕須48小時前預訂,可選擇安排於任何一間餐廳切餅或

於「海洋奇觀」旁嘅「水都餅店」親身拎餅 :)

野人想去海洋公園,其實都只係想睇下動物,坐下CABLE CAR





冇乜做過嘢,好快就關門 XD





今年嘅野仔,6歲嘅野仔

已經唔需要再紀錄佢地自理方面有乜嘢進步

因為基本技能已經全部掌握到 :P

今年最大,亦係我最看重嘅進步就係心智上嘅成熟

兩個開始懂得由心而發去關心、問候其他人

而且會考慮、照顧到其他人嘅感受 :)

就好似月初「毛毛」嘅離開,弟弟送上窩心嘅說話

食飯時候,再唔係只有我同小虎照顧佢地有冇食得飽

而係佢地都開始有照顧番我同小虎有冇食飽 :)

6歲嘅野人,眼目、心中都看到人嘅需要

好高興見到野人長大了 :)

知識嘅增長,可以靠睇多幾本書、上多幾個進修班而得到

而心靈上嘅成長,真係要靠著神以及野人身邊所有人慢慢嘅誘導而成

求主繼續帶領、賜智慧俾我同小虎,好好完成神管家呢個工作 :)

2016年5月22日 星期日

一年一度生日會。LEGO PARTY 2016

由野人一歲開始,每年都為佢地搞生日會

今年去到第6個生日會

亦係小學前嘅最後一個生日會

亦有可能係幫佢地搞嘅最後一個生日會

點解咁講?因為野人生日喺考試月份

搞生日會,唔知有冇同學肯「抽空」出席 :P

既然有可能係最後一次

落足心機、時間搞掂個生日會

今年主題唔使太頭痕,因為「LEGO」呼之欲出!

上年邀請卡大獲好評,今年繼續由虎爸負責
(做得咁好冇理由唔俾佢再做 :P)

佈置方面,用LEGO嘅4個顏色 - 紅、綠、藍、黃做佈置主色

當中唔少得我真係搵LEGO砌咗D嘢做佈置 :)

我真係好滿意自己今年嘅Birthday Cake Table Set-up :P




生日蛋糕方面,今年終於可以參與少少

不過唔係整蛋糕,而係砌蛋糕上面舊LEGO

堅用咗我好多時間諗砌咩

因為用LEGO真係乜都可以砌到!

最後用一晚通宵砌咗同樣係野人鍾意嘅Titanic!!!!!

Titanic當然要配好緊要嘅大海 + 冰山 :P

每年Gina Cake & Dessert嘅蛋糕都令我好滿意 :)


大約3年前,見過Just Kidding嘅生日襟章好靚

所以一直都好想幫野人訂製生日襟章

但野人一直都唔多鍾意有嘢掛喺身

咁我都無謂浪費搵Just Kidding去整

直到今年野人自己開聲想要生日襟章

而且今年係LEGO主題,簡直Perfect Match!!!!

中間個LEGO人仔係野人自己揀

配襯就由「Just Kidding」包辦

最後出到嚟效果比想像中更好,超靚!


生日場地有Playhouse

所以我都只係簡單預備咗兩個少少關LEGO事嘅遊戲俾小朋友玩

上年開始,生日會有8成朋友都係野人自己邀請

今年再大個仔D,100%嚟嘅朋友都係野人自己邀請,全部都係K3同學仔

生日會前一晚,自己回禮禮物,自己包 :P

令全場小孩最開心,當然係喺生日會見到老師


當然野人都好高興可以請到老師嚟自己生日會 :)

每年完咗生日會,令野人最興奮

但令我最頭痛當然就係來自各位厚愛嘅禮物

今年又唔記得宣傳"Unicef - 生日禮物布施"

呼籲生日會參加者作出捐款代替送生日禮物

件事有意義之餘,又唔使囤積大量生日禮物

自從野人4歲生日會開始禮貌布施

今年又唔記得!真失策!

下年如果再有生日會,一定要記得!

2016年5月21日 星期六

兒童戲劇課程 @ 香港話劇團附屬戲劇學校

2014年9月,野人K2

開始帶佢地去香港話劇團附屬戲劇學校學兒童戲劇

仲記得第一堂帶野人上堂嗰種戰戰兢兢嘅心情

因為當時嘅野人,雖然返咗兩年學

但帶佢地去上興趣班,講BYEBYE嗰下,都仲會喊!!!!!!! -___-

所以第一堂帶野人返戲劇班,好驚佢地一入課室會喊

如果喊咗,就有機會要傾好耐先去上堂

更「糟」係傾好耐之後都係唔願意上堂!!!!!!!!

我唔係迫小朋友上興趣班嘅媽媽

但戲劇班,我又真係好想野人上到

因為聞說學話劇,基本功就係要先認識自己、認識情緒

有咗呢個基本功,就可以拿捏到發揮角色嘅技巧

學戲劇,我主要唔係想野人學識「演技」

而係想佢地多認識內裡嘅自己

認識情緒係咩一回事,從而好好處理自己嘅情緒

咁就可以喺生活中好好同其他人相處 :)

好感恩,第一堂戲劇課,野人好「順利」入咗課室

而且好感謝香港話劇團附屬戲劇學校各位老師充滿愛心嘅教導

俾野人好開心上咗兩年戲劇課 :)

連續兩年,每逢星期六都帶野人去同一個地方上堂

今年K3,去到最後一堂

其實我有種唔太捨得嘅感覺,唔知野人會唔會都一樣唔捨得呢?!

題外話︰大家見到野人宜家咁浮誇嘅演技

絕對絕對係上戲劇嘅一個「意外收獲」:P



2016年5月16日 星期一

畢業相 @ FODIO

野人一向對「被影相」都零興趣

所以我都冇帶過佢地去影嗰D家庭影樓相 (無謂不歡而散啦 XD)

但今年野人K3,真係好想帶佢地去STUDIO影輯相留念

而且K3之後,佢地好似對任何事嘅接受程度都高咗

所以就膽粗粗同佢地去JENNY嘅FODIO影畢業相 :P

揀FODIO,因為有朋友去過影相

見到輯相靚之餘,個個小朋友都笑得好自然
(其實我好怕為笑而笑嘅家庭影樓相 :P )

小朋友自然嘅一面係最靚、最應該被捕捉 :)

野人放學後去影相,所以先同同學仔食個靚飯

近來弟弟同呢幾個女同學「玩得好埋」:P

今次約埋2個女同學,組成2男2女組合去STUDIO影相

FODIO地方雖然唔太大,但換衫區/家長等候區都好寬敞、舒適


JENNY真係好識同小朋友相處

影相前先同小朋友溝通、交流下


大約兩個鐘嘅影相過程,小朋友都喺歡笑聲渡過 :)


為咗「慰勞」小朋友笑咗兩個鐘,同佢地去食甜嘢

好快已經有得睇相 (影相後少於兩星期)

真係影得好好好好好呀!!!!!!!!

真係好多謝 + 欣賞JENNY嘅「功力」




同場加映︰

野人老正學校畢業相 + 拍攝花絮 XD

2016年5月8日 星期日

孖人派對@母親節 2016

Happy Mothers’ Day!!!!!

連續第二年同2010孖人會嘅成員搞孖人派對

2015年@父親節,有19對孖人


今年@母親節,同樣都有19對孖人

但此19對不同彼19對 XD


今年同往年一樣,辛苦唒設計 + 帶領遊戲嘅爸爸媽媽們



班孖人愈嚟愈大,場面都愈嚟愈失控 -____-

所以帶遊戲真係好辛苦呀!!!!!!!!!!!!!

我同其他唔使負責遊戲嘅媽媽們

就係「戰場」外傾得勁開心,哈哈哈哈

今次派對除玩集體遊戲外,仲搞咗個「最XXX」選舉

一共有5個項目 :

最似模似樣、最甜到漏、最合拍雙生、最投入遊戲、最狂野

全部由爸爸媽媽投出嚟

最後野人以眾望所歸 + 「高姿態」當選「最狂野大獎」

究竟係老人家講得啱嘅「最怕改壞名」定係大家造馬俾野人當選?!?!?!XD



不過野人當選又好似好有根有據 :P


無論如果,野人過咗一個超開心 + 玩到超攰嘅下晝係肯定嘅

因為夜晚,弟弟祈禱中睡著了Zzzzzzz

母親節後記 :

今年野人送了卡 + 手鍊俾我做母親節禮物

卡內容為 : 一個帶我去食冰,一個帶我去公園 :P