【高雄親子遊】菠蘿黃金城堡 DIY鳳梨酥

啱啱復活節假期，同野人高雄親子遊5日，其中一日，我係。。。無諗定去邊嘅，但作為野人嘅負責任星級導遊，我梗係袋定幾個「景點」喺身，以備不時之需，其中一個拎出嚟應急嘅景點就係去「菠蘿黃金城堡」DIY鳳梨酥！

查實我本來諗住野人唔會揀去「整餅」，因為以前佢哋一定會揀去玩多兩個Playhouse，跑多兩個圈，放多兩打電，但可能佢哋堅大個咗，會想去學下嘢體驗下

好！重點來了！你哋估下。。。「專人導覽菠蘿黃金城堡，包括聽下高雄簡介、維格烘焙專門店歷史、製作鳳梨酥過程(有得食新鮮出爐鳳梨酥)，再加DIY六個造型鳳梨酥，又整又拎」。。。整個過程玩足個半兩個鐘，一大一小幾多錢？？？

登。登。登。登。就係只需台幣$100!!!!!!!即係我地一家四口，合共台幣$200！偷偷講埋你哋知”黃金城堡”入面仲有幾他免費嘢玩呀(自己睇片就知）

想知更多親子旅遊。真。樂趣

記住去3B MAMA FANPAGE睇下喇

https://www.facebook.com/3bmama/

【高雄親子遊】壽山動物園

高雄嘅【壽山動物園】喺山腰位置，地點雖然有啲「吊腳」，但細細地嘅一個動物園用嚟「攝」下兩三個鐘行程時間都唔錯

呢個動物園都堪稱「史上最平」！小孩入場費只係台幣20蚊！(即係大約港幣$6蚊6歲以下仲要免費！！！咩世界）

一入園見到有架觀光小火車(小火車：台幣50/人，仲貴過動物園入場費🤪）小火車差唔多行哂整個動物園，值得坐！(夏天熱到咁，更值得坐）

動物園雖然唔大，但都有齊獅子、老虎、大象、河馬睇。。。

園內中央位置有個我稱呼做「洗腳池」嘅嬉水池，因為水位高度就係大約浸到腳眼位野人見到呢個「洗腳池」即時飛奔去玩！

玩水總係好吸引小朋友(雖則個池其實冇嘢好玩不過夏天嚟講，確實幾消暑🏼)整個動物園，野人逗留最耐就係呢度！

動物園另一驚喜位就係間餐廳。餐廳外有個小型車場如果呢個餐廳喺香港，又會被稱為「必去親子餐廳」喇

想收看更多親子資訊及優惠，請到《3B孖媽生活館》Facebook Fanpage :

https://www.facebook.com/3bmama/

【高雄親子遊】草衙道「鈴鹿賽道樂園」

好多人都知日本名古屋有「鈴鹿賽車場 (Suzuka Circuit)」啦，但可能少啲人知台灣高雄喺2017年都開咗「鈴鹿賽道樂園」喎（至少我都係今年年頭先知）

高雄呢個係日本以外唯一一個海外授權嘅「鈴鹿賽道樂園」，雖然規模就唔及名古屋咁大，但座落喺呢頭上機嗰頭就落機近到飛機餐都要趕住食嘅高雄嚟講，對我哋香港小朋友確係一個幾好嘅選擇

高雄草衙道(Taroko Park Kaohsiung)嘅「鈴鹿賽道樂園」開11點

如果搭超早機真係會趕得切啱啱開館

話明係賽道樂園，玩嘅嘢梗係同車有關，實際玩咩車大家睇片就會一清二楚

特別想講梗係啲實用小資訊：
1）整個樂園有13個設施，如果你買全日任玩套票可以玩13個之中嘅11個，另外兩個需要額外俾嘅就係騎電單車嘅”小小騎士”同埋”迷你鈴鹿賽道”

2）全部設施都有高度要求，當中關於「坐車」嘅遊樂設施，如果小朋友夠高玩得嚟但未夠高自己玩，陪玩嘅第一個大人係免費呀咁如果想加多個大人陪玩，都只係要俾多$30台幣，係咪好抵玩呢？未講完！重點嚟喇未夠高要陪玩就一定啦，原來夠高都可以陪玩，咁樣陪玩嘅大人都係免費呀！！！即係好似我咁，明明野人都夠高自己玩哂所有嘢，但佢想我陪佢「坐」，我係唔使買飛囉呢個Policy真係抵玩過哂香港搞嘅所有呃錢嘉年華

草衙道有「鈴鹿賽道樂園」之外，仲有一個大型商場，入面有個「WeSport」，有迷你高爾夫球、Strider(滑道車)、Roller(直排輪)同搖擺車玩。本來想玩Roller，但原來要自備裝備，所以野仔最後揀玩搖擺車。我哋平日去，每個小朋友只需入場費NTD$20 + 租車費$80就可玩足一個小時！！！即係港幣$30都唔使，就可以將小朋友嘅無限精力釋放一小時！真係超抵玩

另外，商場仲有「遊戲愛樂園」(Playhouse)、「Crazy Jump」(彈床」、「星際戰場」(Laser Wars)、「棒壘球打擊場。。。如果要玩哂，真係玩一日都唔夠時間！要留喺嗰度一日，當然會肚餓啦，唔怕，好多食店選擇，唔怕冇得揀媽媽們仲可以享受下購物樂，因為成個大型商場滿哂鋪頭，真係要講一句「係個一家大細都好啱玩嘅地方」

草衙道 Taroko Park Kaohsiung
營業時間：11am - 10pm (Mon - Fri)；10:30am - 10pm (Sat,Sun,Public Holidays)
地點：捷運「草衙站」

想知更多親子旅遊。真。樂趣

記住去3B MAMA FANPAGE睇下喇

https://www.facebook.com/3bmama/