【帶著爸媽去旅行】子親遊大阪

今年我同亞姐嘅【帶著爸媽去旅行】目的地鎖定了日本大阪，原因

1）爸媽未去過日本

2）我同亞姐都想去日本

3）日本嚟講，我同亞姐比較熟大阪

對於我嘅原生家庭，第三點其實好重要！因為只要俾我媽子一覺得我同亞姐有咩唔肯定、要搵路，我媽子就會拋出一句「點解要去嗰度，喺酒店附近行下咪幾好」

如果我媽子同我爸都係同一類人，咁當然「喺酒店附近行下咪幾好」就真係幾好，但！我爸骨子裡其實係一個好鍾意周圍行下睇下嘅人，但礙於係「愛妻號」嘅關係，如果我媽一出「喺酒店附近行下咪幾好」，我爸就真係會贊成呀所以為著各方嘅利益，我同亞姐嘅策略就係無論去邊都會扮到喺屋企落樓下咁熟，咁就唔會露出破綻喇

「子親遊」嚟講，如果仲要「自由行」，一般都有一個重要原素，就係唔好行太多路！因為爸媽始終年紀大，都會比較快攰，話俾仔女知未攰，大多都係唔想掃興而死頂🥺所以一日嘅景點唔使多，而且行程最好就係「行下坐下食少少嘢又再行下坐下」咁樣。

今次5日4夜「帶著爸媽去旅行」景點包括：

1）大阪城

2）天保山海遊館

3）心齋橋(因為我哋住心齋橋Holiday Inn，所以係每日嘅行程）

4）京都- 稻荷神社

5）京都- 嵯峨野觀光小火車

先講我哋住嘅心齋橋；喺關西機場搭「南海電鐵」就可以直接到達，非常方便！

住呢度當然係貪一落酒店樓下就有嘢行(媽子太早起身喇，我同我姐又未必咁早起到身，住心齋橋嘅話，佢落街都有嘢行下）另外有幾樣香港人必吃嘅嘢都喺心齋橋食到：

1）蟹道樂

2）磯丸水產

3）一蘭拉麵

嚟到心齋橋，梗係要幫爸媽同「固力果人」打個卡啦！

都話行下又要坐下食少少嘢啦

本來喺天保山去完海遊館，想去坐埋摩天輪，點知喺海遊館出嚟落超大雨！摩天輪停止運作。咁所以就喺梅田地標HEP FIVE補番個摩天輪夜景俾我爸

大阪城，一個野人唔會去嘅地方(影相睇風景兩隻嘢未咁高層次）

野人未出世前都有去過大阪城，都係同地標「天守閣」影張相同埋行下大阪城公園就走；今次同爸媽嚟，決定參觀下天守閣裡面。

【大阪城天守閣】

開放時間：0900 - 1700 (最後入場時間為16:30）

休息日：28/12 - 1/1

入場費：600円

天守閣入面有電梯，所以爸媽唔使行好多樓梯都可以喺高處欣賞到城外嘅風光。

天守閣入面幾層都係介紹日本嘅歷史、睇下歷史遺物，就好似歷史博物館咁。最特別最好玩就係有cosplay🤣🤣可以著類似武士服嘅服裝影相，女士都有和服呀。(另外可以俾錢買張有背景效果嘅相🤣）

本來想同爸媽去坐「大阪城御座船」，但好可惜我哋去到天守閣就忘記咗呢件事！所以到我哋醒番起嗰時，當日門票已售罄！！！咁唯有影咗當坐咗啦

【大阪城御座船】

開放時間：

10:00～17:00

(3月～10月：末班船16:50出發)

(11月～2月：末班船16:30出發）

休息日：28/12 - 3/1

班次：10至15分鐘一班

入場費：1500円

我發覺「子親遊」有時比起「親子遊」更容易甩行程，趕唔上啲休館時間因為要悠閒啲嘛好似我哋去天保山海遊館，本來打算坐埋「觀光船-聖瑪麗亞號*」，但我哋去到嘅時間，只可以「海遊館」同「觀光船」二揀一最後只揀咗「海遊館」。

【海遊館】

開放時間：1000 - 2000 (最後入場時間為19:00）

入場費：2300円

【觀光船-聖瑪麗亞號】

營業時間：11:00-16:00 (每小時一班)

費用：1600円

京都嘅風景好啱帶爸媽去，所以就算我哋只去5日咁短，都有一日去咗京都一趟。去京都好多人都會去「清水寺」，但呢段時間咁啱遇著維修，所以冇得去「清水寺」，轉咗去「嵯峨駅」搭「嵯峨野觀光小火車」。

溫馨提示：到咗「嵯峨駅」，記住先買咗火車票，因為會多人到賣哂呀！火車有最特別嘅【5嘅車箱】，呢個係開放式冇玻璃車箱，所以如果你想無障礙咁睇+影風景，記住買5號車箱票(5號車箱票冇得預售，只限即日發售）

由於接住兩班嘅火車票已售罄，所以等坐火車時間，我哋就周圍逛下，仲無意中俾我同姐亂入咗間和服店，係毫無準備下著咗和服，我同姐仲自High嚟個街拍🤣🤣實情係熱到大脾罅標汗🤣🤣

講番「嵯峨野觀光小火車」，沿途風景當然令爸媽好欣賞啦

我哋只買咗單程票，因為我哋喺「小火車龜岡站」落車，再搭車去「稻荷神社」影好多人嘅打卡位：鳥居陣！

最後呢張幫爸媽影嘅相，除咗「執子之手，與子偕老」嚟形容外，都諗唔到其他更好嘅形容喇每年都係，希望每一年都至少有一次可以【帶著爸媽去旅行】

【子親遊大阪小貼士】其實同爸媽去嘅子親遊，大家絕對可以考慮買「大阪周遊卡」，因為好多啱年長人士去嘅景點都有包到，例如我都有/想去嘅「HEP FIVE摩天輪」、「大阪城天守閣」、「大阪城御座船」、「天保山摩天輪」、「天保山觀光船-聖瑪麗亞號」等等，詳情可瀏覽：https://www.osp.osaka-info.jp/cht/

想收看更多親子資訊及優惠，請到《3B孖媽生活館》Facebook Fanpage :

https://www.facebook.com/3bmama/