拍球王比賽 @ 野人學校

野人學校每年都有個"拍球王"活動

目的旨在俾小朋友透過拍球運動多鍛鍊大肌肉 :)

小朋友由N班開始，就可以參加此活動

每年大概去到4月，部份同學就會被揀選參加拍球王總決賽

揀選機制係透過父母喺屋企紀錄小朋友拍球次數、

學校嘅拍球龍虎榜紀錄以及老師觀察幾方面合成

以往每年，我都會鼓勵野人一齊「練波」

但好明顯佢地每年都冇理我啦!!!!! :P

直至K3九月開學，野人突然轉性!!!!!

無啦啦鬥心極強，喺屋企拎個波自我練習!!!!! XD

就因為有練習，野人初初都有喺學校「拍球龍虎榜」榜上有名 :)


但兩隻嘢明顯3分鐘熱度 + 開始見到其他同學拍得勁過自己之後

就冇興趣再拍 -______-

所以最後當然冇被選上參加拍球王總決賽啦 :P

不過!!!!!!! 拍球王總決賽除咗會誕生「拍球王」之外

仲會有另一個「健力士拍球王」誕生 XD

(「拍球王」︰1分鐘之內拍到最多下數；
「健力士拍球王」：連續拍球直至某個時間或以上)

「健力士拍球王」賽前無須選拔

就喺拍球王總決賽當日，人人有份玩，永不落空

野人拍得唔夠快，唔夠多下數

但勝在夠穩定，最終兩個齊齊勝出成為「健力士拍球王」


收到野人同學仔媽媽傳來頒獎張相嗰刻

我感動到標咗兩滴眼淚ㅠㅠ

因為我見到嘅，唔只係攞獎嘅野人

而係我終於見到會認真、專心做一件事嘅野人

贏輸從來唔係最重要，正確人生態度先係最緊要

加油，我的野兒子!!!!!!



咁開心嘅日子，當然值得吃個蛋糕慶祝 :)

野人學校運動會

野人身穿學校運動服

晨早8點就去到九龍仔公園

好明顯就係參加學校運動會 XD


野人第一次參加學校運動會係讀緊N班

照學校慣例，運動會每兩年舉辦一次

所以應該係上年K2再有運動會

但由於上年學校搞咗個水運會

所以運動會就Skip到今年喇

雖然話就話係野人人生第二次學校運動會

但我覺得今次先算得上第一次

因為想當年N班時，年紀太細喇

所以只係被安排喺場邊玩下親子遊戲

今次就唔同喇，野人真係要參加運動項目

睇下野仔比賽前嗰樣幾有鬥心 (果然交到戲XD)

雖然只係幼稚園嘅運動會

但整作都非常認真!!!!

每個「運動員」身上都有運動員號碼「貼紙」

「運動員」進場儀式做到足!!!!


由於主辦運動會嘅係家長教師會

所以身為家教會其中一員嘅虎爸

整個運動會都要做義工家長


絕大部份時間都係得我同野仔三人世界。。。

都係好難得SIP個時間同虎爸影張合照 :P

運動項目有：跑步、跳遠、跳高、擲豆袋

每個小朋友都有機會玩哂4個項目，永不落空

4個項目均設有「冠、亞、季」軍獎項


贏唔到獎盃都唔緊要

每個小朋友「完成賽事」後

都有獎牌一個，又係永不落空XD

雖然話就話係「豬肉牌」

但小朋友拎到獎牌真係超高興！

欣賞家教會呢個做到皆大歡喜嘅安排 :)

運動會完結後，野人應該嫌未夠「運動」

所以再去公園玩「健身器」


而我。。。捱咗咁多個星期早起 + 太陽曬之後

係時候好好幫手、腳、面急X一下 XD

靈糧花市2016 (最後一年。好唔捨得ㅠㅠ)

好快好快好快好快!!!!!!!

時間真係過得太快!!!!!!!

野人學校嘅靈糧花市，終於去到我地有份參與嘅最後一年

野人玩咗4年，我都有幸玩咗4年 :)
(今年負責遊戲「拾糖果」，冇得賣蝦蛟燒賣:P)

相比小朋友，我諗我地一班家長更唔捨得咁快去到最後一年

所以花市活動開始前，瘋狂影相留念 XD





相比我嘅唔捨得。。。

野人有得玩，當然只有興奮，哈哈

每年，每班小朋友都會齊齊造自己班嘅「獅頭」

野人解說自己班個「獅頭」：所有小朋友俾隻獅食唒!!!!!

點解佢地講出嚟嘅嘢，永遠有少少暴力 + 少少恐怖?!?!-__-



寫咗3年靈糧花市BLOG

其實每年靈糧花市玩嘅、食嘅都差唔多

所以今年唔再細寫花市嘅活動內容

如果真係有興趣了解呢間幼稚園呢個活動嘅媽媽們

可以回顧番以往3年嘅3B MaMa Blog，哈哈哈哈

2013：http://bbbmama.blogspot.hk/2013/02/blog-post_691.html

2014：http://bbbmama.blogspot.hk/2014/01/blog-post_23.html

2015：http://bbbmama.blogspot.hk/2015/02/2015.html

特別想寫就係今年野人K3

終於都要喺花市做大哥哥，照顧K1小朋友 :)

先回顧下2年前，野人個「被照顧樣」XD


今時今日，做咗大哥哥，有冇個照顧到人嘅可靠樣?!?!



好彩兩隻嘢都記得教過佢地。。。

「要照顧咗妹妹想做咩，先再去做自己想做/食嘅嘢」

雖然過程中，弟弟試過向我埋怨：

「妹妹只係掛住玩，但我好肚餓，好想去食嘢」(哈哈哈哈)

但就算係咁，佢都係死跟住、照顧住妹妹

所以兩隻嘢喺我同虎爸心中真係做到100分!!!!!!叻!!!!!






今年虎爸做PTA會長，所以有幸上台「吉波」

兩個野人即時做咗虎爸嘅LITTLE BIG FANS

企唒起身，超專心睇住虎爸 :D




快樂嘅時光，永遠都係好快過

花市幾個鐘就咁玩完 :)

但興奮心情冇咁快完，一班同學仔開心飯聚。。。


唔知野人小學之後

我們這一家，一年一華服LOOK仲有冇機會出現呢?!?!

野人學校 – 聆聽小隊長 + 禮貌小天使。終了

野人學校每個小朋友自K1開始都會參與「請聽我讀」計劃

每個小朋友每星期都需要揀定一本小圖書/金句紙/詩篇

搵小朋友/大人聽自己朗讀所揀嘅讀物

每個聽完都要簽名喺小朋友嘅「請聽我讀」記錄紙上

有得呢個「請聽我讀」計劃，當然都要安排人負責聽

每日上課前半小時，校內有兩個「聆聽小隊長」崗位

專責「借」隻耳俾小朋友，聽「請聽我讀」:)

呢個崗位，每個K1至K3嘅小朋友都有份輪流當值

每人每年大約有3 – 4次機會做 「聆聽小隊長」

哥哥做 「聆聽小隊長」，又MEAN人上身

用行動表示個小朋友讀得好細聲 -___-



當值「聆聽小隊長」同日，都需要當值「禮貌小天使」

要企喺學校門口位置，歡迎小朋友返學

兩位囂張小天使又點會合合作作打招呼丫-__-



野人幼園生涯最後一次當值喺1月中完成了

咁重要嘅日子，當然要影張全家幅留念 :P