一年一度生日會。LEGO PARTY 2016

由野人一歲開始，每年都為佢地搞生日會

今年去到第6個生日會

亦係小學前嘅最後一個生日會

亦有可能係幫佢地搞嘅最後一個生日會

點解咁講？因為野人生日喺考試月份

搞生日會，唔知有冇同學肯「抽空」出席 :P

既然有可能係最後一次

落足心機、時間搞掂個生日會

今年主題唔使太頭痕，因為「LEGO」呼之欲出！

上年邀請卡大獲好評，今年繼續由虎爸負責
(做得咁好冇理由唔俾佢再做 :P)

佈置方面，用LEGO嘅4個顏色 - 紅、綠、藍、黃做佈置主色

當中唔少得我真係搵LEGO砌咗D嘢做佈置 :)

我真係好滿意自己今年嘅Birthday Cake Table Set-up :P




生日蛋糕方面，今年終於可以參與少少

不過唔係整蛋糕，而係砌蛋糕上面舊LEGO

堅用咗我好多時間諗砌咩

因為用LEGO真係乜都可以砌到！

最後用一晚通宵砌咗同樣係野人鍾意嘅Titanic!!!!!

Titanic當然要配好緊要嘅大海 + 冰山 :P

每年Gina Cake & Dessert嘅蛋糕都令我好滿意 :)


大約3年前，見過Just Kidding嘅生日襟章好靚

所以一直都好想幫野人訂製生日襟章

但野人一直都唔多鍾意有嘢掛喺身

咁我都無謂浪費搵Just Kidding去整

直到今年野人自己開聲想要生日襟章

而且今年係LEGO主題，簡直Perfect Match!!!!

中間個LEGO人仔係野人自己揀

配襯就由「Just Kidding」包辦

最後出到嚟效果比想像中更好，超靚！


生日場地有Playhouse

所以我都只係簡單預備咗兩個少少關LEGO事嘅遊戲俾小朋友玩

上年開始，生日會有8成朋友都係野人自己邀請

今年再大個仔D，100%嚟嘅朋友都係野人自己邀請，全部都係K3同學仔

生日會前一晚，自己回禮禮物，自己包 :P

令全場小孩最開心，當然係喺生日會見到老師


當然野人都好高興可以請到老師嚟自己生日會 :)

每年完咗生日會，令野人最興奮

但令我最頭痛當然就係來自各位厚愛嘅禮物

今年又唔記得宣傳"Unicef - 生日禮物布施"

呼籲生日會參加者作出捐款代替送生日禮物

件事有意義之餘，又唔使囤積大量生日禮物

自從野人4歲生日會開始禮貌布施

今年又唔記得！真失策！

下年如果再有生日會，一定要記得！

大阪GoGoGo : LEGOLAND Discovery Center

野人年半前去馬來西亞LEGOLAND時

雖然都有玩開LEGO，但就唔算係「最愛」

直至早幾個月前，喺屋企被投閒置散嘅LEGO

突然變成至愛玩具榜第一名！

呢種轉變以弟弟最為明顯

佢可以唔睇電視唔講嘢砌足一個鐘LEGO

所以呢，男人專心一樣嘢，真係唔惹少XD

因為見兩隻嘢變成LEGO迷

今次大阪行一定要去上年先開嘅LEGOLAND Discovery Center

俾野人砌到夠本！

出發LEGOLAND Discovery Center前

先去滿足下自己，去McD食個每次去日本

都必要早餐去食嘅McGriddle!!!!

介始埋俾野人食，正！

LEGOLAND Discovery Center位於天保山

如果大家有去過大阪海遊館

應該對天保山呢個地方唔會陌生

呢個LEGO Center就正正喺海遊館隔離嘅商場入面

離遠見到呢隻咁搶眼嘅LEGO長頸鹿，就知道差唔多到達目的地！

大家可以選擇Walk-in，亦都可以先喺官網買門票

喺官網買門票，有得揀埋入場時間。
官網: https://www.legolanddiscoverycenter.jp/osaka/en/

去到商場門口，跟門票入場時間排好隊

職員就會跟時間安排入場。


由於要核對網上買嘅門票

去到門口位置都要再等一等

等緊嘅時間，小朋友已經可以「先砌為快」

真係非常好嘅設計！

穩陣唔失預算提示 :

每個時段，都會先俾網上買咗門票嘅客人先入去玩

所以如果咁啱去到嘅時段係好多人，甚至Full咗

就要等耐少少先可以入場喇。

穿過LEGO Figure，入場玩喇！

入到去，會先影一張合照


然後就會模擬去咗個LEGO Factory

喺大型屏幕做一個自家獨一無二嘅LEGO Figure

有一秒狂想過會唔會真係有呢隻Figure送番俾我地呢?!?!

最後當然冇啦，哈哈

不過每位小朋友都會收到

LEGOLAND Discovery Center嘅LEGO一粒作禮物

都好開心呀！


場內有兩個大型少少嘅機動遊戲

一個係玩電子射擊。。。

由於個遊戲入口位置黑黑地，野人開始驚

好唔想入去玩，所以個樣搞成咁。。。

不過我覺得野人都大大地

係時候開始要克服下「心魔」

所以我表示會攬住佢地一齊玩

有父母嘅陪伴係最佳克服恐懼嘅方法 :)

最後弟弟都投入個遊戲

而哥哥就。。。睇張相都知佢全程隱藏咗冇玩 XD

另一機動遊戲，好似迪士尼「小飛象」

不過變咗踩單車模式

同EXPO CITY一樣又係踩單車！

日本人係咪好鍾意踩單車?! XD

雖然呢度冇馬來西亞LEGOLAND Hotel Lobby

有大大個LEGO Pool任砌

但都有幾個小小嘅Pool，俾小朋友任砌LEGO

留意到弟弟砌LEGO嘅亮點嘛？(Blog尾揭曉:P)

如果BB年紀仲未識砌LEGO，唔怕！

因為有個BB Corner，可以砌磚頭咁大嘅LEGO

呢款係軟身嘅LEGO，所以絕對放心俾BB玩

場內有個特別少少嘅任砌LEGO

就係將LEGO砌喺一個會搖晃嘅LEGO板上面

小朋友可以隨意調較搖晃嘅程度

試下自己砌嘅嘢有幾堅固!!!!

哥哥沉迷咗，不斷砌，不斷「搖」

又係任砌LEGO系列。。。

場內有個應該係男仔特別鍾意玩嘅砌車場

「Car Races Build」

運用創意，設計並砌成自己架戰車去比併

高矮肥瘦嘅車轆全部都有

男仔天生就鍾意玩「會轉」嘅物件

所以就算唔砌車，齋玩轆都夠開心滿足 XD

點解咁講？因為野人原本都俾少少心機砌下架車

但玩玩下都就咁拎個轆去「比併」哈哈

LEGO CITY PLAY ZONE - 即係PLAYHOUSE

跑呀、跳呀、瀡滑梯呀，絕對係放電之選！

畫畫，寄畫。留意番，唔係堅寄到呀！哈哈

呢期野人咁愛砌LEGO

所以都有上場內嘅LEGO Class長知識

雖然地方唔算大，但都有4D Movie Cinema!!!!

場內當然有好多LEGO供拍照留念

呢座鐘樓，每到整點就會「出來」一次

最靚就係LEGO MINILAND

日夜景會不斷交替，大人小孩都被吸睛




小小溫馨提示：

場內都有個小CAFE，有座位提供

都係賣下簡單三文治、飯團、飲料嗰D

如果好似野人咁玩足大半日

都可以喺CAFE食少少嘢再玩

但味道。。。就唔好有期望喇

P.S. 公布亮點：弟弟又砌Titanic。。。哈！