一個月過去，其實我心情都麻麻 :(
唔係因為姐姐突然請辭，要做番家務
或者因為又要請新姐姐而心煩
而係100%因為屋企突然少咗個人
我個心有份好重嘅缺失感。。。
雖然好多朋友都同我講「對姐姐唔使有真感情」
而且我姐姐其實係欠落一身債走咗去
但係我就係對佢有種唔捨得嘅感覺
見過我姐姐嘅朋友，應該都知我姐姐態度其實唔太好
直頭可以用「串」嚟形容
家務方面，其實又唔係做得好好
明明每日都要做嘅家務，有時都可以忘記得乾乾淨淨
但。。。佢就係由野人仲喺我個肚
到宜家野人已經5歲半，一直陪住野人成長嘅一個靈魂人物!!!!!
以前我有時都會幻想玉豆姐離開我地屋企嘅畫面
唔知野人有咩反應?!我自己又會有咩感覺?!
始終「天下無不散之筵席」，姐姐一定會有走嘅一日
其實我以前每次諗，每次都會眼濕濕
雖然喺我幻想之中未出現過突然請辭呢個畫面
但結果都係眼濕濕，我呢一個月每次同朋友提起玉豆嘅事
我每次都係眼濕濕。。。
可幸嘅係，野人對玉豆姐呢件事唔係有太大嘅負面情緒
可能佢地都知姐姐做咗唔啱嘅事，唔走唔得
而且姐姐走咗呢段時間，我同虎爸陪佢地嘅時間都多咗好多
加上野人宜家都大大地，對姐姐嘅倚賴都比以前少
所以都唔使太擔心野人嘅心靈狀況
可能我嘅心靈狀態比野人更差 :P
野人可能知我心情不佳，送我SWEET HEART畫一幅 :)
由於冇姐姐，又唔想野人婆婆要長時間湊住兩隻嘢
所以野人學校新年假未完嘅日子
虎爸帶住兩隻嘢返工返咗兩日XD
而我自己，就有自己嘅「開工大吉」
冇兩隻嘢陪，只有醒獅陪我 :P
其中一日，3父子放咗工去接我放工，齊齊晚飯 :)
SWEET SWEET~~~
飯後。。。當然要。。。飯後甜品 :)
姐姐閃後小插曲：
姐姐走咗，雖然我地都有請鐘點EE嚟屋企打掃地方
但係虎爸都趁住呢個機會，俾野人做下家務!!!
記得姐姐閃人第3日。。。
我：「D碗等我一陣洗」
(飯已經係小虎煮，我唔好意思碗都唔洗:P)
點知小虎回我：「乜你識洗碗咩???」
我：「碗都唔識洗，你當我低能呀?!」
最後D碗當然唔使我洗 :P
記得未結婚前，我老豆都會去洗碗
佢去洗碗係因為覺得我結婚後有排要做家務
所以趁佢可以幫我做，就儘量幫我做
點知最後我嫁著個老公，完全唔使我做家務 :P
感謝主，喺我生命出現兩個咁愛錫我嘅男人 :)
