野人6歲生日之快閃海洋公園

野人生日正日係SCHOOL DAY

之前佢地一直表示生日想去「海洋公園」

睇睇海洋公園個開放時間，原來6點就關門大吉

放學去到都差唔多一點啦

所以只短短逗留海洋公園5小時

香港人生日免費入園，野人第一次享用此優惠

(要佢地簽個名拎飛，即係呢個名真係簽嚟都可有可冇，好好笑!!!)


為爭取時間，喺「海洋奇觀」入面嘅海龍王餐廳食午飯

咁就可以邊睇魚邊吃埋飯


順便預訂咗個驚喜小蛋糕俾野人喺海龍王餐廳慶祝 :)

提示︰蛋糕須48小時前預訂，可選擇安排於任何一間餐廳切餅或

於「海洋奇觀」旁嘅「水都餅店」親身拎餅 :)

野人想去海洋公園，其實都只係想睇下動物，坐下CABLE CAR





冇乜做過嘢，好快就關門 XD





今年嘅野仔，6歲嘅野仔

已經唔需要再紀錄佢地自理方面有乜嘢進步

因為基本技能已經全部掌握到 :P

今年最大，亦係我最看重嘅進步就係心智上嘅成熟

兩個開始懂得由心而發去關心、問候其他人

而且會考慮、照顧到其他人嘅感受 :)

就好似月初「毛毛」嘅離開，弟弟送上窩心嘅說話

食飯時候，再唔係只有我同小虎照顧佢地有冇食得飽

而係佢地都開始有照顧番我同小虎有冇食飽 :)

6歲嘅野人，眼目、心中都看到人嘅需要

好高興見到野人長大了 :)

知識嘅增長，可以靠睇多幾本書、上多幾個進修班而得到

而心靈上嘅成長，真係要靠著神以及野人身邊所有人慢慢嘅誘導而成

求主繼續帶領、賜智慧俾我同小虎，好好完成神管家呢個工作 :)

毛。妳要走了。。。

毛毛 - 我家姐的小狗狗

13多歲的她，在5月第一個晚上走了 :(

這件傷心事，其實唔多想提起

因為毛毛就算唔係我自家養的狗狗

但每次想起她走了的事實

仍會眼淚不止在心裏流

不過我很想在這裡用一篇網誌來紀念她

好好記下她在我生命曾留下的痕跡

自出娘胎的我，就唔知點解好怕動物

所以由細到大，屋企都唔會出現寵物

直到後來家姐自己住，養了毛毛

其實當時我仍是怕所有動物，當然包括毛毛

所以每次到家姐屋企

毛毛都無奈地被限制活動範圍

直至慢慢的與毛毛「遠距離」相處

是她的乖巧令我最後完全不怕她 :)

毛毛老了，要走了。。。

雖然這是無可改變的人生定律

但送她最後一程的一刻，對她真是充滿不捨

感謝生命中曾經出現毛毛

感謝她帶給我、還有野人的一切快樂回憶 :)

親子餐廳 - 「唐」(Tong’s Road House Seafood and Grill)

喺香港，要有小朋友配套嘅餐廳其實選擇唔多

最常見嘅都係部份大型連鎖餐廳

會提供畫紙、幾支畫筆俾小朋友娛樂自己 :P

如果要帶小朋友去一間「真正」有得食又有得玩嘅親子餐廳

選擇就真係少之有少。。。

好羨慕台灣有好多好好嘅親子餐廳，真係多到去唔唒!!!!!!

近期喺香港「發掘」咗間位於元朗屏山嘅親子餐廳

「唐」(Tong's Road House Seafood and Grill)

雖然位置上係偏遠咗少少。。。不過都值得一試 :)

如果搭輕鐵前往，喺屏山站步行至「唐」都唔算太遠

如果駕車前往，見到高高嘅「TONGS」大牌匾就知到喇

餐廳門外有十數個車位


「唐」用餐區有室外 / 室內兩部份


野人有個肥佬大汗虎爸，當然選擇室內 :P

P.S.事後發現好彩揀室內，因為都頗多「蚊」

所以大家記住做足防蚊措施!!!!!!

「唐」有LUNCH BUFFET，但由於我地到達時間比較晏

所以就點餐牌上嘅食物 :)


呢個包，好食!!!!!「伴包」嘅自家製士多啤梨醬都好好食 :)

「唐」主打都係PIZZA、PASTA、FRIES之類嘅菜式

全部菜式都好KIDS-FRIENDLY :)



今次除咗野人家之外，同行仲有我想同佢做朋友

但佢成日唔理我嘅大笑BB XD


介紹完食物，當然要講下呢個親子餐廳有咩玩

「唐」有個戶外花園

戶外花園都有少少用餐區

所以如果想一邊食，一邊睇住小朋友玩

可以選擇呢個戶外用餐區。。。

野人食飽後，就開始喺呢個戶外花園玩

有得玩沙、爬車軑、玩鞦韆、有得「畫」、有得「敲擊」。。。






另外，餐廳會定期舉辦主題WORKSHOPS

詳情可以留意「唐」嘅FACEBOOK FANPAGE

https://www.facebook.com/tongsroadhouse/

親子餐廳其中一個好處就係。。。

小朋友玩完一輪，又可以再食過嘢!!!!!

就咁悠悠閒閒又過咗一個週末下午 :)


夜晚去第二個節目，野人太嫲生日飯

90多歲嘅太嫲，祝身體健康，主恩常在 :)

點解每次野人見到E-MA都要搞到佢「失唒儀態」XD

失驚無神自助餐 :P

野人有個自助餐達人「虎爸爸」

呢個達人近期又「引」起

無啦啦點都要去食個自助餐 -___-



其實我自己就唔太LIKE自助餐文化

因為某個角度，自助餐都係助長緊「浪費食物」

但野人好似都受到虎爸嘅影響，每次食自助餐都好興奮

(睇下佢地3父子食得幾咁HAPPY :P)

本來去食餐自助餐就冇乜特別事要記低

但食完呢餐之後嘅事就好值得記低

哥哥食完之後，病。咗。一。個。星。期

我估並唔關酒店事，只係時間咁啱咁吻合 (因為我、虎爸、弟弟都冇事)

最重要係。。。野人學校老師都知道哥哥食完自助餐就病咗

唔知會唔會以為佢食得太博命，博命到病埋呢?! :P

7年癢不癢之結婚紀念日@HELLO KITTY中菜軒

時間過得快到好緊要!!!!! (即係快老得好緊要!!!!!)

我唔覺自己已經結婚7年，更唔覺自己已有2個6歲仔仔 :P

7年時間，其實唔算太長，但足以發生很多很多事。。。

興興奮奮結婚、戰戰兢兢懷上雙胞胎、邊做邊學做父母

為孩子難免有爭執。。。

一個孩子已經夠多事情要去好好適應

何況我和小虎這對新手父母，一開始就要面對兩個早產嬰兒

煩的事當然夠多，爭執隨之都很多

關係亦都慢慢變差。。。

但主真的很懂我、很愛我

透過很多不同渠道告訴我，給自己一個限期、一個出口。。。

三年！忍、等、捱三年，一切都會好起來！

現在，不快事都過去。。。

回想起來，果然，神很信實

困難在那裡，恩典都在那裡 :)

只要在困難時，眼目不要離開主耶穌

只要一直仰望耶和華，神的平安、幫助、喜樂都會臨到 :)

「我們愛，因為神先愛我們」(約翰一書4:19）

相信神就是要我們在婚姻關係裡活出這份愛吧

一段婚姻關係，確實能成為榮耀神的一個有力見證

感謝小虎信主後，由原本對我的好，變得更好更好 :)

感謝他7年來。。。
包食、包住、包水電煤
包任勞任怨、無理取鬧
包車出車入
包湊仔
包做家務
包....容忍我的臭脾氣及無數串咀臭臉 XD

每年結婚紀念日，小虎都會送我花 :)

今年第7年，我有種儲齊7龍珠的感覺 :P

以往每年我同小虎都會二人世界食餐飯慶祝

但今年因為姐姐的突然請辭，新姐姐又未到

所以就要拉埋兩隻小鬼陪我食其中一個至愛

HELLO KITTY中菜軒

每樣食物都「的的骰骰」


最可愛食物造型，首選「臘腸卷」:)

唯獨是這個HELLO KITTY大包，真係大過我塊面

食半個已經飽到一個點!!!!!! -__-


食物質素，樣樣都差唔多

但「咸水角」HELLO KITTY蝴蝶結，最好唔好ORDER (好厚皮:P)

最後，當然食物不是重點，重點都是全家人食得開心、幸福 :)