兩隻嘢玩到超開心，所以事隔唔夠一年
暑假都等唔切，就要ENCORE!!!!!! :P
而且今次有野人女同學仔一齊澳門「游」
野人一定玩得更Happy :)
哥哥真係好鍾意GALAXY，堅持要我幫佢影GALAXY全景 :P
回顧番少少資料。。。
Galaxy Macau渡假區總共有6間酒店：
- The Ritz-Carlton
- Banyan Tree
- JW MARRIOTT
- Hotel Okura
- Galaxy Hotel
- Broadway Macau
上年住Okura，貪佢夠「和風」
木地板嘅酒店房，感覺好乾淨 :)
今年住JW MARRIOTT
貪新鮮之餘，因為JW有兩個自家泳池 (只限JW住客使用)
其中一個仲要係唔太深水嘅小朋友池
最開心仲有條「孖條」滑梯仔
野人只係瀡呢條滑梯仔，已經好玩到唔想玩其他玩水區 :P
整個Galaxy渡假區，玩水地方主要分兩個區域
一個就有激流、童樂島、3條刺激滑梯 (近JW Marriott)
另一個就有衝浪池、 小型玩水區 (被Okura、Galaxy、Banyan包圍）
先講近JW Marriott嘅激流
呢個就係大家喺各大廣告都見到嗰條有透明部份嘅激流
相信係將呢條透明管道影得最好最清楚嘅一個位 :)
(今年冇專登去影呢張相，所以重用舊相 :P)
唔知係咪自己無記性？記錯？
上年嚟玩呢條激流明明係冇浪
只係水流有D急急地將D人不斷推前
今年嚟玩，有好一大段路程都幾大浪
相比之下，感覺好玩過上年好多!!!!!
野人今年已經好熟水性
所以兩隻嘢好心急拎水泡想自行落水-__-
兩隻嘢坐喺水泡上面已經唔會再好似上年咁We嘩鬼叫
搞到我神經緊張，感覺隨時候命要救佢地
今年最多都只係哥哥因為唔夠弟弟快而嘈嘈閉 XD
所以我終於可以好自在咁享受「漂流」感 :P
(不過激流始終深水，所以就算小朋友識游水
都要著救生衣玩先至安心）
激流有多個出入口
所以唔一定要「漂」哂整個激流
其中一個激流嘅出口，連接咗一個泳池
池水由深到淺，池邊仲有沙玩
又係小朋友好鍾意停留嘅地方之一
激流外，仲有小朋友可以狂跑嘅童樂島
另外就係有3條啱大朋友玩嘅滑梯
個人感覺呢3條滑梯速度都真係幾快！
所以係幾刺激、幾好玩！
不過要夠120cm高先可以玩
所以野人就唯有齋睇我玩喇 :P
玩夠其中一區，就去衝浪池嗰邊
兩個玩水區，計埋小朋友慢慢行下又停下
大約距離10分鐘路程
小朋友每次上水都感覺凍凍地
所以唔想小朋友上水「Sip」到會凍親
最好都係玩完一邊再到另一邊
唔好兩邊走嚟走去咁玩
兩邊各有特色，睇下你個人喜好留邊度玩耐D喇
我記得上年暑假。。。
衝浪池玩嘅水泡，要俾錢租呀!!!!
今年再嚟，變咗免費任玩喎
有水泡玩人造浪，好玩好多!!!!
衝浪池旁邊仲有個小型嘅小孩玩水區
玩到肚餓點算？
好簡單！兩個玩水區分別都有餐廳
我地食呢間就喺激流嗰邊嘅「微風」餐廳
食飽、休息陣、又可以再玩水 :)
留意玩水區每晚6、7點就會停止開放
所以如果小朋友好似野人一樣咁愛玩水
強烈建議住3日2夜 :)
野人爸一向都係自助餐達人
而澳門JW MARRIOTT嘅自助餐一向好評
所以其中一晚我地都去試試
果然「性價比」真係高
先講今次我地嘅價錢俾大家參考：
成人– $425；小童 – $215 (價錢已包服務費)。
以呢個價錢，比較香港嘅自助餐
JW呢個確係豐富好多!!!!!
生蠔有3款揀，而且絕對唔係「發育不良」生蠔
自助餐必要元素：龍蝦、蟹、蟹腳、蝦樣樣齊
而且提供幾款任飲果汁 (面前嘅蘋果汁係其中一款)
野人都激讚呢個自助餐，第二晚表示要「再食」!!!!!!!@@
下次去澳門先再食啦，如果連續兩晚食自助餐
膽固醇應該會超標 XD
自助餐另一驚喜位係。。。巧遇野人老師 :D
原來野人老師嚟2日1 夜Banyan Tree做SPA，好正呀!!!
如果唔食自助餐，夜晚都仲有好多選擇
特別係Galaxy Macau渡假區嘅「百老匯大街」
(同我地住嘅酒店係一馬路之隔，由酒店行去大約要10-15分鐘)
比較多人認識嘅就有「度小月」、「新斗記」、「添好運」
我地今次就選擇咗食萄國菜 – 福龍葡國餐
餐廳有個花園仔同埋OUTDOOR位置
如果唔太熱，坐OUTDOOR都係唔錯嘅選擇
食物味道方面，有驚喜，係GOOD嘅!!!!!
特別係「厚切芝士飽」，哥哥差D好味到要食唒全碟!!!!!
就係因為太好味，相都冇影就食唒 XD
另外要讚一讚好親切嘅店員
好有心機解釋俾我地知，店內幾款啤酒嘅分別 :)
下次再去GALAXY都應該會再去食 :)
