【郵輪假期】台灣野柳の海洋世界、十分瀑布、天燈

喺郵輪瞓醒一覺，已經接近去到台北嘅基隆港口。食個郵輪餐廳自助早餐就落船開始我哋一日行程。

留基隆嘅時間長過之前留喺高雄，朝早11點幾落船可以玩到夜晚9點，所以我哋可以去兩個地方兼去遠少少喺基隆呢邊落船方便好多，因為行出少少已經有好多的士搭，唔使好似之前一日喺高雄落船咁，要等好耐先有車！

第一站就係「野柳海洋世界」。呢個海洋館都可以話係野人去過最細嘅一個大約大半個鐘至一個鐘就行完。

呢度都有類似香港海洋公園嘅「海洋劇場」，有海豚同海獅表演。

整個表演最震撼我心係「高空跳水」，真係超高咁跳落嚟！睇到我嚇一嚇！

「野柳海洋世界」旁邊仲有「野柳地質公園」，可以睇風化而成嘅景觀，最知名就係「女王頭」。因為我同老板喺野人未出世嗰時已經去過呢個地質公園，野人又應該對睇石頭冇乜興趣，所以我哋就冇入地質公園，去咗「十分」睇瀑布、放天燈。

睇「十分瀑布」其實好睇天氣，如果之前落過雨，瀑布就會好澎湃；但如果嗰排冇乜雨落，瀑布都會乾塘，剩得水滴！好好彩，我哋睇到「真。瀑布」

十分放天燈嘅地方，係喺火車路軌上面放，路軌兩邊差唔多全部都係賣天燈嘅舖頭。我哋求其入咗間舖頭，買咗天燈，就開始「創作」喇。

因為畫天燈嘅位喺「真。路軌」上面，所以畫畫下有時會有火車經過！全部人一齊「散水」嗰時，超搞笑！

賣天燈俾我哋嘅舖頭職員超專業！畫好之後，職員會幫我哋影埋相，教我哋點樣影好哂天燈嘅「四面」之後，天燈先會放上天！

十分放完天燈返到基隆都天黑，未夠鐘返上船，就去咗「基隆夜市」。野人好鍾意去夜市，次次都好高興！

明明夜市食完嘢，返上船又食過都好嘅，坐郵輪就有呢樣好，隨時都有嘢食🤣

想收看更多親子資訊及優惠，請到《3B孖媽生活館》Facebook Fanpage :

https://www.facebook.com/3bmama/

【郵輪假期】高雄の恐龍樂園、夢時代購物中心

郵輪離開香港，不斷咁行咗差唔多20個鐘之後，就去到第一站「高雄港」。

高雄呢個落船位置，交通配套唔係做得咁好，只有的士可以選擇，咁多人一次過落船，最後就梗係要等好耐先有的士。我見有部份落船乘客見咁多人等的士，一係就索性行出去個「城」，一係就折返返上船唔出去。我哋就堅持出去，最後連等車時間用咗差唔多一個鐘去到親子商場【夢時代購物中心】。

我哋堅持離開郵輪就係因為「夢時代」旁邊有個期間限定嘅戶外恐龍樂園。講真，玩嘅嘢唔多，都係騎下恐龍、同恐龍近距離接觸影下相，但對於「恐龍控」野人嚟講，已經相當吸引！

大約一個鐘就玩完「恐龍樂園」(其實天氣好熱，都逗留唔到太耐）由於大約7點就要返上郵輪，所剩時間唔太多，我哋就去番附近嘅【夢時代購物中心】。呢個商場係一個親子商場，基本上台灣品牌嘅兒童場呢度都會有！例如PaPark兒童館、騎士堡兒童育樂園、湯姆熊歡樂世界、奇幻島親子嘉年華、遊戲愛樂園、Happy100遊樂館。我哋就去咗玩「Happy 100」，因為有野人鍾意玩嘅幾個元素：車、船、火車

有個「空中踏單車」好值得玩，尤其是我哋咁啱撞正日落時間，超靚(仲可以遠眺到我哋坐嚟嗰隻郵輪）

玩完天黑返上船，港口位置有幾間台灣手信店，可以順便買啲我至愛「豬肉紙」

想收看更多親子資訊及優惠，請到《3B孖媽生活館》Facebook Fanpage :

https://www.facebook.com/3bmama/