【親子/媽媽Metime】自助烘焙店

每年結婚週年紀念日，老板都會送我花❤️今年係結婚十週年紀念，我都「煞有介事」咁自家製咗個充滿Fantasy嘅🌈彩虹雲彩蛋糕🎂回贈老板多年來嘅照顧(忍讓😆）

雖然係自家製蛋糕，但其實又唔係喺屋企自家製😜實情係去咗一間全程只係拎住部「平板」、睇住教學片段，就整得出蛋糕嘅自助烘焙店「Bakebe」👩🏻‍🍳

初初想試呢啲自助烘焙店都有少少隱憂嘅👉🏼🙄👈🏼搞唔搞得掂呀我？冇「人」教？整蛋糕我手殘呀喎😅😅

但呢間嘢又好多「吸引點」引我去喎😙

1) 時間超彈性⏰

👍🏼因為完全個人化，純粹對住教學片，唔使儲埋一班人上堂，所以超多時間可以選擇 (Full Booking就冇辦法喇😜）

2) 教學片段非常清晰👀

👍🏼初時都驚驚地自己唔識乜粉物粉嗰啲名，工具啲名又搞唔清😅但原來唔使識呀！全部材料、用具都「標貼」哂個名，只要睇住段教學片，對住個材料架係咁執就得，超簡單！

3) 唔使跟進度，輕輕鬆鬆完成🤘🏼

👍🏼出去跟班學，都怕怕地自己手腳慢，跟唔到進度或拖慢人哋勁唔好意思😪但當成件事只係對住部平板學就完全冇呢個尷尬情況喇！搞唔掂隨時可以返轉頭睇番前面個step(或好奇心驅使，睇後幾個step都得😆我就係咁，整到中段，一次過睇埋未整嘅steps鼓勵自己快手整😆）

4) You’re not Alone, 唔識可以問職員👩🏻‍🍳

👍🏼係就係對住段教學片自己整自己嘢，但職員間唔時都會走埋嚟睇睇搞唔搞得掂(甚至會伸出援🖐🏼😜) 我呢啲手殘人，總有啲功夫嘢係搞唔掂要職員幫忙，例如最後個Packing就係職員包呀！🥰

(其實真係我問題，同場有個男仔整蛋糕俾女友生日，佢完全冇嘢要問自己搞掂哂👏🏼👏🏼👍🏼）

5) 咖啡包茶包自拍棍隨意享用☕️

👍🏼等焗蛋糕或真係想歇一歇嘅時間，可以隨意沖杯茶/咖啡飲下、坐下、感覺悠閒；另外，場內提供自拍棍，包你自拍到鍾意嘅角度🤳🏻😆

6) Last but not least, 整完乜都唔使洗🧽

👍🏼我諗好多人都鍾意整下甜品/蛋糕嘅，不過一諗到整完要洗碗，就。。。不如買算啦😆但喺呢個自助烘焙店就完全令人冇咗呢個後顧之憂，只係需要盡情享受整餅嘅時間，真係玻璃碗都唔覺意用多幾隻😜

自家製蛋糕 @ 自助烘焙店 全紀錄💁🏻‍♀️

註：自助烘焙店可以「一人獨行」、「二人同行」或最多「一家3口」共享親子烘焙時間；如果2個人或以上同行，將會收取額外費用，詳情可參考烘焙店網址。

【Bakebe】

地址：灣仔軒尼詩道19-21號，金鐘商業大廈3樓

網址：http://www.bakebe.com/

想收看更多親子資訊及優惠，請到

《3B孖媽生活館》Facebook Fanpage :

https://www.facebook.com/3bmama/