神。是。我。安。慰

10年前，公公離開，有親人離去那種傷感

現在，婆婆不在，除那份傷心外，更有一種好深好深的不捨......

婆婆走左翌日，同野人去左公園

我自己一個坐左喺草地 (唔知係咪小虎有心俾個時間我自己安靜下)

問左神好多問題......亦都諗起好多以前嘅事.......

其實長大後，有時生活到好攰嗰時

都會好懷念以前細個嗰時.......好想返去以前嘅日子.....


每逢放假都會去婆婆屋企住，

每朝茶樓都未開燈，就跟亞婆去飲茶

對住一班既熟悉又陌生嘅婆婆飲茶 (日日見，但永遠唔記得佢地嘅名)

下晝就會坐喺亞婆腳邊睇佢打麻將，永遠覺得嗰一刻偷飲佢嗰杯奶茶係全世界最好味嘅奶茶

我嘅打麻將技術都係嗰時學返黎

有時就會同亞婆上天台幫佢D植物淋下水

夜晚會訓喺屋外嘅露台，就算喺市區，就算夏天都唔覺熱

Weekend放2日假，都要去亞婆屋企

因為我同媽子講 : 亞婆屋企好多野食!

其實從前嘅時光真係好美好......

諗到呢度......有個啱啱識行嘅小朋友走過黎我身邊

想拎野人個波去玩

我知道神話俾我知每件事，有完結，才有開始......

呢幾日，睇番好多野，原來最後一次同婆婆去茶樓係7月......

婆婆最後清醒同我講嘅說話係差唔多一個月前.....

我俾佢睇野人嘅相，佢同我講"細路哥係咁架喇...."

我知道其他家人應該比我更傷心，更難過，例如俾亞婆湊大嘅家姐

呢一個星期，神透過詩歌俾到我好大嘅安慰.......

希望我嘅家人都藉著詩歌，心裡滿有從神而來嘅平安同盼望.....